‘सम्हालिन्छ कहिले मन’ले नेपाली फिल्मलाई एक स्टेप माथि लैजान्छ: निर्देशक सुदर्शन थापा

भदौ १७ बाट प्रदर्शनमा आउने फिल्म सम्हालिन्छ कहिले मनको शीर्ष गीत सार्वजनिक भएको छ ।

काठमाडौंमा एक भव्य कार्यक्रम गर्दै फिल्मको शीर्ष गीत सार्वजनिक गरिएको हो । सुयश भट्टराईले लेखेको यस गीतमा गायक सुगम पोखरेलको स्वर छ भने शैलेन्द्र डि प्रधानले कम्पोज गरेका हुन् । यो गीत झन्डै दुई दशकअघि रिलिज भएको सुगम पोखरेलको चर्चित गीत ‘सम्हालिन्छ कहिले मन’ कै रिमेक हो ।

बेलायतका उत्कृष्ट गन्तव्यहरुमा छायाँकन गरिएको फिल्ममा समावेश यस गीतको भिडियोले त्यागको मर्मलाई उतारेको छ । त्यसो त, सम्हालिन्छ कहिले मनको ९५ प्रतिशत सुटिङ बेलायतमा गरिएको जानकारी निर्माण पक्षले दिएको छ । मेकिङवाईज यो फिल्म नेपाली फिल्म इतिहासकै एक कोशेढुंगा साबित हुने दाबी निर्माण पक्षले गर्दै आएको छ ।

गीत सार्वजनिक कार्यक्रममा फिल्मका निर्देशक सुदर्शन थापा, निर्माताका अजितकुमार थापा, कलाकारहरु पुजा शर्मा, आकाश श्रेष्ठ, सोनाम तोप्देनलगायत उपस्थित थिए । पत्रकारहरुले खचाखच हलमा बोल्दै निर्देशक थापाले आफ्नो फिल्म नेपालमा चलिरहेका फिल्मभन्दा एक कदममाथि जानुपर्छ भन्ने लक्ष्य राखेर निर्माण गरिएको बताए । ‘ हामीले चलिरहेको फिल्मभन्दा एक स्टेप माथि जानुपर्छ भनेर यो फिल्म खिचेका हौं । कोभिडअघि नै फिल्म छायाँकन गरेका थियौं, आजको दिनमा आइपुग्दा हाम्रो त्यो प्रयास सार्थक भएको छ, ’ उनले भने,‘ हाम्रै देशमा चलेका विदेशी फिल्म पनि हाई बजेट र मेकिङका छन् ।

फिल्मले आफ्नै तरिकाको मेकिङलाई ध्यान दिनुपर्छ । आज हाम्रै फिल्म हलमा साउथमा बनेका हेभी फिल्म चलिरहेका छन् । हामी पनि आफ्नो लेभलबाट कति माथि जाने त ? यसरी सोचेर यो फिल्म बनाएका हौं । हामी सम्पूर्ण टिमले फिल्मलाई के के चाहिन्छ, त्यसमा कम्प्रमाइज नगरी बनाएका छौं । हामीले लुकेर खिच्न नपरोस् भनेर अनुमति लिएरै बेलायतमा ठूलो क्यान्भासमा खिचेका छौं ।’

निर्माता अजितकुमार थापाले यस फिल्ममा आफूहरुले गरेको मेहिनत १७ भदौमा फिल्म प्रदर्शनमा आएपछि सबैलाई थाहा हुने बताए । ‘जति पनि मेहिनत गरेका छौं । १७ भदौमा फिल्म हेरेपछि यो थाहा हुन्छ,’ उनले भने,‘ हामीले कुनै पनि ठाउँमा कुनै पनि कम्प्रमाइज गरेका छैनौं । यो एउटा मेगा प्रोजेक्ट नै हो । यसले नेपाली फिल्मलाई एक स्टेप माथि लैजान्छ ।’

निर्देशक थापाले लभस्टोरी भएपनि यस फिल्मलाई प्रिजेन्टेशन फरक एंगलबाट गरिएको बताए । ‘ लभस्टोरी भएपनि फरक एंगलबाट प्रिजेन्टेशन गरिएको छ , विदेशी भूमिमा खिचिएको छ , यसको मेकिङ र प्रिजेन्टेशनलाई मन पराउनुहुन्छ भन्नेमा विश्वस्त छौं,’ उनले भने ।

नायक आकाश श्रेष्ठले सम्हालिन्छ कहिले मनको सुटिङ उत्कृष्टभन्दा उत्कृष्ट गन्तव्यमा गरिएको बताए । ‘राम्रो मुभी बनेको छ । स्कटल्यान्ड र दुबई, नेपालको मुस्ताङलगायत क्षेत्रमा सुट गरिएको छ,’ उनले भने,‘यो फिल्मले नेपाली फिल्म क्षेत्रलाई नयाँ स्थानमै लैजान्छ भन्ने आशा लागेको छ । सबैले सफल हुन्छ भन्ने लागेर नै काम गरेका छौं ।’

नायिक पुजा शर्माले यस फिल्मका लागि सबैले अत्यधिक मेहिनत गरेको बताइन् । ‘टिमवर्क कस्तो छ भन्ने फिल्म हेरिसकेपछि थाहा हुन्छ,’ उनले भनिन्,‘यो नेपालकै उत्कृष्ट फिल्म हो । मेगा फिल्म हो, यसको कथाले मानिसहरुलाई छुनेछ ।’
कलाकार सोनाम तोप्देनले पनि फिल्म निकै राम्रो बनेको बताए । कभर सिंगर सोनामले यही फिल्मबाट नेपाली फिल्ममा डेब्यु गर्दैछन् । फिल्ममा सरोज खनाल, गौरी मल्ल, धिरेज शाक्यलगायत पुरानो पुस्ताका स्टार कलाकारहरु पनि छन् ।