स्क्रिप्ट लेखन सुरु नहुँदै किन रोकियो पूजा र रेखाको सहकार्य ?

कुनै समयकी चर्चित नायिका रेखा थापा र अहिलेकी चर्चित नायिका पूजा शर्माले केही महिना अगाडि एकसाथ फिल्म बनाउने तयारी गरेका थिए । नयाँ फिल्मका लागि पूजा र रेखाको भेटघाट पनि बाक्लो हुने गर्दथ्यो । रेखा र पूजाले फिल्मको कथा लेखनका लागि स्क्रिप्ट राइटरलाई समेत साइन गरिसकेका थिए ।

रेखाको बिहे अगाडि नै सुरु भएको यो प्रोजेक्ट कथा पनि नलेख्दै रोकिएको छ । संभवत अब पूजा र रेखाको सहकार्य अगाडि बढ्ने छैन । रेखा र पूजा तिन नायिका भएको एक्सन फिल्म बनाउने तयारीमा थिए । रेखाले एक्सन फिल्ममा काम गर्दै आएकी हुन् । लभ स्टोरी फिल्ममा रुचाइएकी पूजाले पनि एक्सन फिल्ममा काम गर्ने सोच बनाएकी थिइन् । अर्की एक चलेकी नायिका राखेर फिल्म बनाउने उनीहरुको तयारी थियो । तर, लामो समय चलेको भेटघाट अहिले रोकिएको छ ।

अझ, कहिलेकाही त रेखाको बयानमा पूजामाथि चर्कै कटाक्ष समेत सुनिने गरिन्छ ।

रेखासँग फिल्मको सहकार्य रोकेर पूजा आफै एकल फिल्म बनाउने तयारीमा छिन् । यसका लागि उनले नायक अनमोल केसीसँग नयाँ फिल्मका लागि संझौता समेत गरिसकेकी छिन् ।