पुष्पको घोषणा–‘कृष्णलीला’ नचले पारिश्रमिक फिर्ता गर्छु’

रोहित–रत्नको निर्माणमा तयार भएको फिल्म ‘कृष्णलीला’ भोलीबाट रिलिज हुँदैछ । यो फिल्मको प्रचारका लागि नायक पुष्प खड्काले कुनै पनि कसर बाँकी राखेका छैनन् । दीपक वलीको निर्देशनमा तयार भएको यो फिल्मको ट्रेलर, गीतलाई दर्शकले रुचाएका छन् ।

यो फिल्म रिलिजको एक दिन अगाडि रहँदा पुष्पको ढुकढुकी पनि बढेको छ । यो फिल्मबाट श्रद्धा क्षेत्रीले नायिकाको रुपमा फिल्म क्षेत्रमा डेब्यू गर्दैछिन् । पुष्प र श्रद्धाले फिल्मको प्रचारमा जुन तरिकाले सक्रियता देखाएका छन्, यो कुरा अन्य कलाकारले पनि सिक्न आवश्यक छ ।

यो फिल्मका लागि पुष्पले राम्रै पारिश्रमिक समेत वुझेका छन् । कलाकारले महंगो पारिश्रमिक लिने, तर फिल्म नचल्दा निर्माता ठूलो मर्कामा पर्ने नियती नेपाली फिल्ममा देखिदै आएको पनि हो ।

तर, नायक खड्काले भने यो फिल्म नचलेको खण्डमा आफ्नो पारिश्रमिक नै फिर्ता गर्ने घोषणा गरेका छन् । मेरो फिल्मसँग कुरा गर्दै उनले भने–‘यदि, यो फिल्म चलेन भने म निर्मातालाई मारमा पार्दिनँ । म आफ्नो पारिश्रमिक फिर्ता गर्न तयार छु । फिल्मका लागि हामीले खुबै मिहिनेत गरेका छौं । साथमा, फिल्म राम्रो पनि बनेको छ । यसैले, फिल्म चल्नेमा म विश्वस्त भने छु ।’

फिल्मको ‘आयौं मनको मझेरीमा तिमी, सिरानी भइदियोस्’ बोलको गीत सुपरहिट भैसकेको छ ।