बेनिशा हमालः फिल्म क्षेत्रले नचिनेको उम्दा कलाकार

फिल्म ‘स्वर’बाट डेब्यू गरेका ३ नायिकाहरु, बेनिशा हमाल, केकी अधिकारी र रीमा विश्वकर्मा मध्ये फिल्म क्षेत्रमा केकी अधिकारी धेरै अगाडि बढिन् । बेनिशाको यात्रा ढुलमुल देखियो । रीमा त नायिकाको रुपमा हराइन् नै । धेरै अगाडि बढेपनि केकी अधिकारीले आफ्नै नाममा फिल्म चलाउने दम देखाइनन् । अभिनय राम्रै गर्ने केकी सामाजिक संजालमा लेख्ने स्टाटस र मिडियामा दिने अन्तरवार्ताले बढी चर्चित छिन् ।

ढुलमुल यात्रा गर्दै अगाडि बढेकी बेनिशाले फिल्म ‘ब्लाइन्ड रक्स’मा काम गरेपछि केही संभावना देखाइन् । उनले फिल्म ‘झ्यानाकुटी’मा काम गरेपछि भने अभिनयमा राम्रै संभावना देखाएकी हुन् । तर, पनि बेनिशाको करिअरको यात्राले गती लिएन । बेनिशा बरु मुम्बइमा निर्देशनको कोर्ष सिक्न पुगिन् । तर, कोरोनाले उनको करिअरलाई मुम्बईमा अगाडि बढाउन सकेन ।

उनै, बेनिशाले अभिनय गरेको फिल्म ‘प्रेमगञ्ज’ शुक्रबारदेखि रिलिज हुँदैछ । यो फिल्म रिलिज अगाडि नै बेनिशा फिल्म ‘छक्का पन्जा ४’मा अनुबन्धित भैसकेकी छिन् ।

फिल्म ‘प्रेमगञ्ज’ले बेनिशालाई फेरि एकपटक नेपाली फिल्म क्षेत्रमा उम्दा कलाकारको रुपमा परिचित गराउने पक्का छ । बेनिशा आफै पनि आफूले पाएको जुनसुकै भूमिकालाई निर्वाहा गर्न शतप्रतिशत मिहिनेत गर्ने बताउँछिन् ।

यो फिल्म रिलिजपछि बेनिशालाई नेपालका चर्चित ब्यानरले पनि पत्याउने अपेक्षा गर्न सकिन्छ । अभिनयका हिसाबले उनले ‘प्रेमगञ्ज’बाट पनि गज्जब नजिता दिएकी छिन् । बक्स अफिसमा उनका लागि ‘छक्का पन्जा ४’ले फलदायी रिजल्ट दिने अपेक्षा गरिएको छ ।

बेनिशा नेपाली फिल्म क्षेत्रले नचिनेको एक उम्दा कलाकार हुन् । जसले, आफूलाई हर क्षण पुष्टी गरिरहेकी छिन् । बेनिशाको आगामी दिन सुखद बनोस्, शुभकामना ।