आफ्नो वाचा अनुरुप सविनले राखे शौचालयमा सेनेटरी प्याड

अभिनेता सविन श्रेष्ठ र अभिनेत्री अनु शाहले काठमाडौंका पाँच ठाउँमा निःशुल्क प्याड उपलब्ध गराएका छन् । उनीहरुले गौशाला, नयाँ बसपार्क, रत्नपार्क, भृकुटीमण्डप र स्ययम्भुमा महिनावारी प्याड राखेका छन् । सविनले केही दिनअघि सार्वजनिक शौचालयमा महिनावारी प्याड निःशुल्क उपलब्ध गराउने घोषणा गरेका थिए ।

आफ्नो सोही वाचा अनुरुप सार्वजनिक शौचालय भएका पाँच ठाउँमा उनीहरुले बक्ससहित महिनावारी प्याड राखेका हुन् । सविनले यसरी राखिएका प्याड आपतकालीन अवस्थामा महिला तथा दिदी बहिनीका लागि उपयोगी हुने विस्वस्त ब्यक्त्त गरेका छन् ।

सविनले भनेका छन्, ‘आपत परेको बेलामा अथवा किनेर प्रयोग गर्न नसक्ने दिदी बहिनीलाई सजिलो होस् भनेर यो राख्ने सोच बनाएको थिएँ । ‘हामी अरु ठाउँमा पनि यो कामलाई निरन्तरता दिनेछौँ ।’ निःशुल्क सेनेटरी प्याड राख्ने काम काठमाडौँ महानगरपालिकाको अनुमति लिइ यी शौचालयहरुमा राखिएको सविनले जानकारी दिएका छन् । सविनले छवि ओझाको निर्माण रहेको फिल्म ‘अन्दाज’बाट नेपाली फिल्ममा डेब्यू गरेका थिए । यसअघि उनले कान्तिपुर टेलिभिजनबाट प्रसारण भएका केही टेलि सिरियलमा अभिनय गरेका थिए ।