प्रियंकाको कमब्याकमा दयाहाङको साथ

नायक दयाहाङ राई र नायिका प्रियंका कार्कीको जोडी केही बर्ष अगाडि खुबै जम्यो । बजारमा दुईले मिलेर चलचित्र साइन गर्ने गरेको चर्चा समेत चल्यो । प्रियंका र दया मिलेर प्रोडक्शन कम्पनी खोल्ने तयारी समेत गरेका थिए । तर, पछि प्रियंका र दयाले बाटो मोडे ।

प्रेमी आयुष्मान देशराज जोशीसँग बिहे गरेर आमा बनेपछि प्रियंका कार्कीको करिअरलाई लिएर अनेक खालका टिप्पणी हुने गर्दछ । प्रियंका आफैलाई पनि फिल्म क्षेत्रले आफूलाई स्विकार गर्छ या गर्दैन भन्ने सधै नै शंका छ ।

तर, उनलाई विस्तारै नाम चलेका ब्यानर र निर्देशकले फिल्ममा लिन थालेका छन् । रामबाबु गुरुङले निर्देशन गर्न लागेको नयाँ फिल्ममा प्रियंका अनुवन्धित भएकी छिन् । फिल्मको वर्किङ टाइटल ‘फूलबारी’ राखिएको छ । भदौबाट छायांकन सुरु हुने यो फिल्ममा प्रियंका र दयाहाङ केही बर्षको अन्तरालपछि देखिन लागेका हुन् । फिल्ममा दयाको पिताको भूमिकामा नायक विपिन कार्की देखिदैछन् । बाबु र छोराको कथा भन्ने फिल्ममा प्रियंकाको भूमिका के हो भन्ने खुलाइएको छैन ।

तर, करिअर अप्ठ्यारो मोडमा पुगेको समयमा दयाले प्रियंकाको हात समातेका छन् ।