स्क्रिप्ट हेर्छु भन्ने मलिकाले रोजेको ‘पानी फोटो’ कस्तो छ ?

नायिका मलिका महतले तेश्रो फिल्म साइन गरेकी छैनन् । ‘पर्खि बसे २ र केन्द्र मोसन पिक्चर्स’ले बनाउने भनेका फिल्म पनि यसै रोकिए । यसैले, मलिकाको अबको तेश्रो प्रोजेक्ट के हो भन्ने उनका फ्यानलाई कौतुहलता छ । मलिका भने आफुले केही फिल्मको कथा पढेपनि चित्त नवुझेको बताउँछिन् । मलिकाका अनुसार, उनले मन छुने कथा नै पाएकी छैनन् ।

मन छुने कथा नपाएर फिल्म साइन नगरेको बताउने मलिकाको ‘पानी फोटो’मा भूमिका कस्तो छ ? यो फिल्ममा मलिकाको लामो दृश्य छैन । फिल्मका अधिकांश दृश्यमा अनुप बराल र मेनुका प्रधान नै हाबी छन् । मलिका यसमा जोडिन मात्र आइपुगेकी हुन् ।

फिल्ममा मलिकाले गरेको अभिनयले उनको करिअरलाई ठूलो फाइदा गर्ने देखिदैन । उनी मेनुकालाई साथ दिने एक स्कुलको शिक्षिकाको भूमिकामा छिन् ।

दर्शकले मलिकालाई लकडाउनमा रोमान्टिक नायिकाको रुपमा बढी रुचाएका छन् । यसैले, मलिकाले केही फिल्ममा आफूलाई रोमान्टिक नायिकाको रुपमा अगाडि बढाइन् भने उनको करिअरलाई फाइदा हुने देखिन्छ । मलिकाका लागि यो फिल्म ‘हात्ती आयो हात्ती आयो फुस्स’ जस्तै बनेको छ ।