‘छक्का पन्जा ४’को लुक्स लिक हुँदा के भन्छन् दीपकराज ?

सोमबारदेखि छायांकन सुरु भएको फिल्म ‘छक्का पन्जा ४’मा मुख्य कलाकार दीपकराज गिरीको लुक्स कस्तो छ भनेर दर्शकले अब फिल्मसम्म नै कुर्नु परेन । किनकी, टिकटकमा दीपकको लुक्स भाइरल छ ।

हुनत, दीपकको यो लुक्स फिल्ममा कतिबेला देख्न पाइन्छ अहिले नै भन्न सकिने अवस्था होइन । तर, अधिकांशले फिल्ममा दीपकको इन्ट्री नै यही लुक्सबाट हुने अड्कल काटेका छन् ।

कारागारबाट बाहिरिदै गर्दा पञ्चेबाजा सहित स्वागत गरिएको दृश्य टिकटकमा बाहिरिएको हो । तर, दीपकराज यो लुक्स सार्वजनिक भएर फिल्मलाई असर नपर्ने बताउँछन् । उनले भने–‘मेरो बाहिरिएको लुक्स फिल्ममा छोटो मात्र छ । मुख्य लुक्स त अर्कै हो ।’

उनले, सामाजिक संजालमा फिल्म छायांकनका दृश्यहरु खिचेर नहालिदिन पनि आग्रह गरे । तर, फिल्मको छायांकन सुरु भएदेखि नै दैनिक कुनै न कुनै तरिकाले फिल्मको प्रचार भैरहेकोमा भने उनी खुशी छन् ।

हेमराज वीसी निर्देशित यो फिल्ममा दीपकको साथका केदार घिमिरे, दीपाश्री निरौला, बेनिशा हमाल, मलिना जोशी लगायतका कलाकारको अभिनय छ ।