फ्राइडे रिलिज : देशभरिका हलहरुमा ‘पानी फोटो’

आज शुक्रबारबाट देशभरिका हलहरुमा फिल्म ‘पानी फोटो’ प्रदर्शनमा आएको छ ।

खगेन्द्र लामिछानेद्वारा निर्देशित फिल्म ‘पानी फोटो’ आज साउन १३ गतेदेखि देशभर प्रदर्शन आएको हो । ‘पानीफोटो’ दशक अगाडि गुरुकुलमा मञ्चन भएको चर्चित नाटक ‘पानीफोटो’ कै अनुरुपण गरिएको फिल्म हो । स्वयम् खगेन्द्रले आफू लिखित नाटकलाई फिल्मको स्वरुप दिएका हुन् ।

फिल्ममा छोरा कुरेर बस्ने बाबुआमाको कथा प्रस्तुत गर्ने फिल्म खगेन्द्र लिखित यही नामको नाटकको फिल्मांकन हो । लामिछानेको डेब्यु निर्देशन रहेको ‘पानीफोटो’का निर्माता रोजिना सिटौला र रवीन्द्र बज्राचार्य हुन् ।

फिल्ममा अनुप बराल, मेनुका प्रधान, मलिका महत, खगेन्द्र लामिछाने, प्रकाश घिमिरे, माओत्से गुरुङ, बुद्धि तामाङ, रमेश अधिकारी, कमलमणि नेपाल, अनुज पाण्डे, राधा श्रेष्ठ, श्याम कुमारलगायत कलाकारहरूको अभियन छ ।

फिल्मलाई देशभरकै मल्टिप्लेक्सले औषत शो दिएका छन् । क्यूएफएक्स चेनले देशभरका हलमा २१ शो उपलब्ध गराएको छ । यस्तै, बीग मुभिज, वान सिनेमाज लगायतका हलमा पनि फिल्मले अपेक्षित शो पाएको छैन ।

‘पशुपति प्रसाद’ र ‘धनपति’ जस्ता सफल नेपाली फिल्महरु निर्माण गरेको टुकी आर्ट्स प्रालिले मञ्जुश्री फिल्म प्रोडक्सनसँगको सहकार्यमा ‘पानीफोटो’ निर्माण गरेको भएको हो ।