फिल्म क्षेत्र छाडिसकेकी मलिना ‘छक्का पन्जा ४’मा किन फर्किइन् ?

पूर्व मिस नेपाल मलिना जोशीको फिल्म यात्रा अपेक्षा गरे अनुसार सफल हुन सकेन । निरन्तर फिल्म असफल भएपछि मलिना निराश थिइन् । यसैले, उनले फिल्ममा काम नगर्ने सोच बनाइन् ।

मलिनाले अनलाइन व्यवसायक सुरु गरेकी थिइन् । प्रेममा परेपछि उनले आफूलाई फिट राख्नका लागि पनि खुबै मिहिनेत गरेको भिडियो उनको सामाजिक संजालमा देख्न सकिन्छ ।

फिल्म नै नखेल्ने सोच बनाएकी मलिना अन्ततः ‘छक्का पन्जा ४’को ब्रान्डसँग लोभिएकी छिन् । सोमबार फिल्मको शुभसाइत समारोहमा भेटिएकी यी पूर्व मिस नेपालले भनिन्–‘म फिल्म नै नखेल्ने सोचमा पुगेकी थिएँ । तर, २ साता अगाडि यो फिल्मको एक जना दाईले फोन गरेर फिल्मको अफर गर्नुभयो । मैले कथा सुन्छु भनेँ । मन परेपछि काम गर्न तयार भएकी हुँ ।’

‘छक्का पन्जा’को ब्रान्डसँग जोडिन अधिकांश कलाकार चाहन्छन् । मलिनाका लागि यो ब्रान्डको लोभ पलाएको पक्कै हो । यो फिल्म सफल भएपछि मलिनाले डुबिसकेको फिल्मी करिअर अगाडि बढ्ने वुझेकी छिन् । यसैले, छाडिसकेको फिल्म क्षेत्रमा उनी फेरि फर्किएकी छिन् ।