‘कबड्डी ४’को रेकर्डबारे दीपकको तर्क–‘हामीलाई रेकर्डमा वास्ता छैन’

दीपकराज गिरी र दीपाश्री निरौलाले बनाएको फिल्म ‘छक्का पन्जा ३’ले बक्स अफिसमा बम्पर व्यापार गर्यो । दीपकको भनाइलाई मान्ने हो भने फिल्मले २० करोडको ग्रस कलेक्शन गरेको छ । तर, यो फिल्मलाई ‘कबड्डी ४’ले तोडेको यो फिल्मको निर्माणपक्षको दाबी छ । फिल्मले २३ करोड हारहारीको ग्रस कलेक्शन गरेको निर्माताले दाबी गर्दै आएका छन् ।

तर, केही दिन अगाडि क्यूएफएक्सका संचालक भाष्कर ढुंगानाले देशकै ठूलो चेन हलमा ‘कबड्डी ४’ भन्दा ‘छक्का पन्जा ३’को व्यापार धेरै अगाडि रहेको बताएपछि रेकर्डको बारेमा बहस हुँदै आएको छ ।

यो बिषयमा ‘छक्का पन्जा ३’का निर्माता तथा कलाकार दीपकराज गिरीले पहिलो पटक मुख खोलेका छन् । उनले भने–‘पहिलो कुरा त दर्शकको मनमा बस्न सक्नु नै सबैभन्दा ठूलो रेकर्ड हो । दोश्रो कुरा, हामीलाई रेकर्डमा विश्वास छैन । कुन फिल्मको रेकर्ड दर्शकको मनमा लामो समयसम्म बसिरहन्छ भन्ने भोली थाहा भैहाल्छ ।’

उनले, आफूहरु कहिले पनि रेकर्डको पछि नलागेको बताउँदै अरुको रेकर्डको कुरालाई वास्ता नगर्ने बताए । उनले, दर्शकले फिल्म राम्रो भनिदिएको खण्डमा त्यो नै ठूलो सफलता हुने तर्क गरे । फिल्म ‘छक्का पन्जा ४’को छायांकन सोमबारदेखि सुरु गरेका दीपकले दशैंको वरिपरी फिल्म रिलिज गर्ने तयारी गरेका छन् ।