नम्रता र पूनमको ‘डेसान’ मंसिर २३ मा रिलिज हुने

फिल्म ‘डेसान’को फस्टलुक सार्वजनिक भएको छ । सार्वजनिक २ वटा फस्टलुकलाई फरक–फरक तरिकाले बनाइएको छ । यो फिल्मको फस्टलुकसँग प्रदर्शन मिति पनि घोषणा गरिएको हो । फिल्म मंसिरको २३ गतेबाट रिलिज हुने निर्माणपक्षले बताएको छ ।

सार्वजनिक २ पोष्टरमध्ये एकमा मुख्य कलाकारहरु नम्रता सापकोटा, भोला सापकोटा, पूनम थापा र निशान चौहान गम्भिर मुद्रामा छन् । अर्को पोष्टरमा पूनम र निशानलाई रोमान्टिक तरिकाले प्रस्तुत गरिएको छ ।

पर्फमिङ आर्ट क्रियशनको ब्यानरमा निर्मित यो फिल्ममा कविता आले, आरुषजंग सारु, मलिका बस्नेत, प्रमीशा सारु मगर लगायतका कलाकारको अभिनय छ । चक्रबहादुर महर्जनले खिचेको फिल्मको कथा राजु थापाले लेखेका हुन् । फिल्ममा हरि लम्सालको संगीत, मिलन श्रेष्ठको सम्पादन छ ।

कोरोना महामारीको त्रासादीमा छायांकन गरिएको फिल्मले मनोरञ्जनका साथै उपयोगी सन्देश पनि दिने दाबी निर्माणपक्षको छ । राज थापा काउचाको कथा रहेको फिल्मको कार्यकारी निर्माता कृशाला मगर हुन् । फिल्मलाई नेपाल भन्दा पहिले विदेशमा रिलिज गरिनेछ ।