दीपकले बेनिशालाई पार्किङमा अफर गरेका थिए ‘छक्का पन्जा ४’

नायिका बेनिशा हमालको आज जन्मदिन हो । जन्मदिनको अवसरमा बेनिशाका लागि कलाकारद्धय दीपकराज गिरी र दीपाश्री निरौलाले फिल्म ‘छक्का पन्जा ४’ नै उपहार दिएका छन् । यो फिल्मको आज शुभसाइत गरियो । फिल्मको छायांकन पनि आजैबाट सुरु भएको छ ।

बेनिशालाई यो फिल्मको अफर कसरी आयो होला त ? बेनिशा भन्छिन्–‘म एउटा फिल्मको शोमा पुगेकी थिएँ । दीपक दाई र निर्मल शर्मा दाई पनि त्यही शोमा आउनु भएको थियो । गाडी पार्किङमा भेट हुँदा उहाँले मलाई असारमा समय मिलाउ हौं भन्नुभएको थियो । त्यसपछि उहाँहरु जानुभयो ।’

यसपछि बेनिशाले कैयौं दिन फिल्मको अफर आउँछ कि भनेर फोन पर्खिइन् । तर, उनलाई यो टिमको कसैले पनि फोन गरेन । अचानक केही दिन अगाडि दीपाश्री निरौलाले फोन गरेर अब काम गर्नुपर्छ भनेपछि मात्र उनले फिल्ममा पक्का भएको ठानेकी थिइन् । बेनिशा हाँस्दै भन्छिन्–‘दीपकजीसँग एक चरणको कुरा त भयो होला भनेर दीपा दिदीले भन्नुभयो । मैले वुझेकी पार्किङमा भएको छोटो कुराकानी एक चरणको रहेछ ।’

बेनिशा यो फिल्ममा जोडिन आफूलाई पहिलेदेखि नै मन लागेको बताउँछिन् । अहिले फिल्मको मुख्य नायिकाको रुपमा काम गर्न पाउँदा उत्साहित भएको बेनिशाको भनाई छ ।