दीपक–दीपाको अनटाइटल फिल्ममा बेनिशा र मलिना फाइनल

नेपाली फिल्म क्षेत्रका सर्वाधिक सफल निर्माताद्धय दीपकराज गिरी र दीपाश्री निरौलाले बनाउन लागेको नयाँ अनटाइटल प्रोजेक्टमा नायिका फाइनल गरिएको छ । दीपक–दीपाको प्रोजेक्टमा नायिका को हुन्छन् भन्ने चासो सबैलाई थियो ।

यसैविच, निर्माणपक्षले नायिका बेनिशा हमाललाई फाइनल गरेको छ । बेनिशाले केही दिन अगाडि मात्र फिल्म साइन गरेकी हुन् । यस्तै, फिल्मका लागि अर्की नायिका मलिना जोशी पनि फाइनल भएकी छिन् । फिल्ममा मुख्य नायिकाको रुपमा बेनिशा र सह–नायिकाको रुपमा मलिनाले काम गर्नेछन् ।

फिल्मको नाम ‘माग्ने राजा वा छक्का पन्जा ४’ मध्ये के राख्ने भन्ने अझै फाइनल गरिएको छैन । फिल्मको स्क्रिप्टको काम भैरहेको दीपकले बताएका छन् ।फिल्मको छायांकन साउनको ९ गतेबाट सुरु हुनेछ । फिल्मलाई असोजको २८ गते रिलिज गर्ने तयारी निर्माणपक्षको छ ।

फिल्ममा दीपक र दीपाको साथमा निर्मल शर्माको पनि लगानी रहनेछ । फिल्ममा दीपकराज गिरी, केदार घिमिरे फाइनल छन् । अन्य कलाकारको बिषयमा जानकारी मुहुर्तमै दिने निर्माणपक्षले बताएको छ ।