‘महापुरुष’लाई दशैंमा ल्याउने तयारी, तर चुपचाप छायांकन

राम्रो फिल्म बनाएको खण्डमा कुनै चाडपर्व वा बिदा खोज्नु पर्दैन भन्ने उदाहरण त ‘कबड्डी ४’ले पुष्टी गरिसकेको छ । जेठ १३ मा रिलिज भएको यो फिल्मले करिब २३ करोड हारहारीको ग्रस कलेक्शन गर्दा त्यस्तो कुनै बिदा हेर्नु परेन । तर, अझै पनि नेपाली मेकरहरु चाडपर्व र बिदाकै पछि लाग्न छाडेका छैनन् ।

भदौं महिनामा फिल्मको लामो लाइनअप छ । तर, दशैं र तिहारमा पनि फिल्म रिलिजका लागि तछाडमछाड देखिएको छ ।

असोजको ७ गते ‘प्रेमगीत ३’, असोजको १४ गते ‘परदेशी २’ आउने पक्का छ । दशैंमा नै दीपकराज गिरीको फिल्म आउने चर्चा चलेपनि अहिलेसम्म छायांकन नै नभएकाले यही मितिमा आउँछ भन्ने पक्का छैन ।

तर, चुपचाप छायांकन गरिरहेको फिल्म ‘महापुरुष’को निर्माण टिमले भने दशैंलाई नै टार्गेट गरेर काम अगाडि बढाएको वुझिएको छ । यो बिषयमा फिल्मका निर्देशक प्रदीप भट्टराई, कलाकारहरु हरिवंश आचार्य, मदनकृष्ण श्रेष्ठ, गौरी मल्ल कसैले पनि केही बोलेका छैनन् ।

तर, तिहारमा पहिले नै २ ठूला फिल्म आएपछि अब ‘महापुरुष’लाई असोजको १४ गते रिलिज गर्ने आन्तरिक तयारी थालिएको छ । फिल्मको अनलाइन सम्पादन पनि भैरहेकाले निर्माणपक्ष हतारोमा देखिएको हो । यदि, यो फिल्म पनि असोजको १४ मा नै रिलिज भयो भने दशैंको भिडन्त प्रतिस्पर्धात्मक हुने पक्का छ ।