अष्ट्रेलियामा पूजाको उपस्थितीमा ‘म यस्तो गीत गाउँछु २’को भव्य शो

फिल्म ‘म यस्तो गीत गाउँछु २’को विशेष शोका लागि नायिका पूजा शर्मा विगत ३ दिनदेखि अष्ट्रेलियामा छिन् । अष्ट्रेलियाको विभिन्न ३ शहरमा यो फिल्मको शो हुनेछ । जसअन्र्तगत यो फिल्मको पहिलो शो सोमबार अष्ट्रेलियाको न्यू क्यासलमा भव्य रुपमा सम्पन्न भएको छ ।

शोको विदेश राइट्स लिएको नेपसिनेका नेपाल प्रमुख विधान कार्कीले दर्शकको उच्च सहभागीतामा शो सम्पन्न भएको बताए । उनले भने–‘अहिलेसम्म न्यू क्यासलमा ‘बुलबुल, कबड्डी कबड्डी र म यस्तो गीत गाउँछु २’को मात्र शो भएको छ ।

न्यू क्यासल शोको व्यवस्थापन कृष्णराज अर्यालले गरेका हुन् । कृष्णले पनि दर्शकले फिल्म मन पराएको र उच्च सहभागीता जनाएको भन्दै खुशी व्यक्त गरे ।

न्यू क्यासलमा भव्य रुपमा शो सम्पन्न भएपछि नायिका पूजा शर्मा सोमबार नै सिड्नी पुगेकी छिन् । सिड्नीमा शुक्रबार फिल्मको शो आयोजना हुँदैछ । जुलाई २२ तारिखमा बेलुकी ६ बजे सिभिक थिएटरमा शो आयोजना हुन लागेको नेपसिनेले जानकारी दिएको छ ।

सिड्नी शोमा नायिका पूजा शर्मासँग बसेर फिल्म हेर्न र फोटो खिच्न दर्शकले पाउने आयोजकले बताएको छ । न्यू क्यासलको शोमा निर्देशक शोभित बस्नेत पनि सहभागी थिए ।

नेपालमा सुखद कमाई गरेको र दर्शकले पनि उत्कृष्ट प्रतिक्रिया दिएको यो फिल्मले अष्ट्रेलियाका बाँकी राज्यमा पनि राम्रो व्यापार गर्ने अपेक्षा गरिएको छ ।