फेसबुकबाट सविनको घोषणाः फिल्म बनाउनेदेखि महिनावारी प्याड वितरण गर्नेसम्म

नायक सविन श्रेष्ठ विगत केही समयदेखि युट्युबमा सक्रिय छिन् । प्रेमिका अनु शाहसँग मिलेर उनले बनाएका भिडियोहरुले युट्युबमा राम्रै भ्यूज पाइरहेका छन् । यसकारण, पनि उनी फिल्म खेल्न भन्दा युट्युबमा भिडियो बनाउन नै बढी हौसिएका छन् । सविनले अभिनय गरेको ‘म’ नामक फिल्म साउनको २० गतेबाट रिलिज हुँदैछ । यो फिल्मपछि सविनको फिल्म करिअरको दिशा अझै स्पष्ट हुनेछ ।

कुनै समय सविनको फिल्म हप्तैपिच्छे हलमा लाग्थे । उनले पनि अफर आएका कुनै फिल्म छाडेनन् । तर, दर्शकले भने उनको साथ छाडे । उनै, सविनले केही महिना अगाडि निर्देशक सविर श्रेष्ठसँग मिलेर फिल्म बनाउने जानकारी फेसबुकबाट गरे । फिल्मको बिषयमा अन्य केही कुरा फाइनल नभएपनि, आफूले बनाउने फिल्ममा सविर निर्देशक हुने उनको घोषणा थियो ।

उनै, सविनले २ दिन अगाडि आफूले राष्ट्रिय सभा गृह अगाडिको शौचालय, भूगोल पार्क अगाडिको शौचालय, गंगबु बसपार्क भित्रको सार्वजनिक शौचालय, गौशालामा रहेको सार्वजनिक शौचालय, नयाँ बाँनेश्वरमा भएको सार्वजनिक शौचालयको महिलातर्फ निःशुल्क प्रयोग गर्न सकिने गरि महिनावारी प्याड सहितको बक्स राख्ने विचार गरेको बताएका छन् ।

उनको यो सोचको सबैले प्रशंसा गरेका छन् । सविनले यसो गर्दा आफूलाई सामाजिक काम गरेर हिरो बन्न लागेको आरोप लागेपनि अरुलाई पनि यस्तै काम गरेर हिरो बन्न चुनौती दिएका छन् । सविनले यो कामका लागि काठमाडौं महानगरपालिकासँग सल्लाहा र अनुमती लिने पनि उल्लेख गरेका छन् ।

सविनले यो कामको थालनी कहिलेबाट गर्ने हुन्, त्यसको प्रतिक्षा उनका फ्यानलाई छ ।