‘कबड्डी ४’को रेकर्ड ‘प्रेमगीत ३’ले तोड्ने प्रदीपको दाबी

३ बर्षपछि दर्शकमाझ एक महिनाको अन्तरमा २ वटा फिल्म लिएर आउन लागेका नायक हुन्, प्रदीप खड्का । यसलाई कलाकारको हिसाबले सुखद मान्न सकिदैन । किनकी, कलाकार आफ्नो फिल्म यति छोटो अन्तरमा रिलिज होस् भन्ने चाहदैन । तर, कलाकारको सोचले मात्र फिल्म रिलिज नहुने भएकाले यस्तो समस्या धेरैले भोग्ने गरेका छन् ।

नायक प्रदीप खड्का अभिनित फिल्म ‘प्रेमगीत ३’ असोजको ७ गतेबाट रिलिज हुँदैछ । दशैंको छेकोमा रिलिज हुन लागेको यो फिल्म प्रतिक्षित छ । हिन्दी भाषामा समेत डबिङ गरिएको फिल्मलाई लिएर निर्माणपक्ष उत्साहित छ ।

अझ, यो फिल्मलाई लिएर नायक प्रदीप खड्का सबैभन्दा बढी उत्साहित छन् । उनले, यो फिल्मले ‘कबड्डी ४’को रेकर्ड ब्रेक गर्ने दाबी गरेका छन् ।

प्रदीपका अनुसार, दशैंमा रिलिज हुन लागेको ‘प्रेमगीत ३’ले २३ करोड भन्दा बढीको ग्रस कलेक्शन गर्नेछ । प्रदीपले भदौको १० गतेबाट रिलिज हुन लागेको फिल्म ‘प्रकाश’ले भने उनका अघिल्ला फिल्मको रेकर्ड ब्रेक गर्ने दाबी समेत गरेका छन् । यो प्रदीपको आत्मविश्वास हो या महत्वकांक्षा त्यो फिल्म चलेपछि थाहा हुन्छ । तर, यी दुबै फिल्मबाट प्रदीप निक्कै आशावादी रहेको वुझ्न सकिन्छ ।

यी दुबै फिल्मले प्रदीपले भने अनुसारको कमाई गरेको खण्डमा उनी नेपाली फिल्म क्षेत्रको नम्बर १ नायकको स्थानमा पुग्ने पक्का छ ।