एकसाथ २ फिल्मको प्रमोशन कसरी गर्लान् प्रदीपले ?

नायक प्रदीप खड्का अभिनित फिल्म ‘प्रकाश’ भदौको १० गतेबाट रिलिज हुँदैछ । यो फिल्ममा प्रदीप स्टार नभएर कलाकार देखिएका छन् । यसैले, उनले यो फिल्मको प्रमोशन पनि कलाकारको शैलीमा गर्नुपर्नेछ । यो फिल्मको प्रचारका लागि प्रदीपले एक महिना भन्दा बढी देश दौडाहा गर्दैछन् ।

यही फिल्म रिलिज भएको एक महिना पनि वित्न नपाउँदै प्रदीपको चकलेटी स्टारडममा फिल्म ‘प्रेमगीत ३’ रिलिज हुँदैछ । यो फिल्ममा प्रदीप राजाको छोराको भूमिकामा देखिदैछन् । जहाँ, उनले नायिकासँग रोमान्स गर्नेछन्, भिलेनसँग युद्ध गर्नेछन् । यसरीहेर्दा, प्रदीपको काँधमा एकसाथ दुई जनराका फिल्मको प्रमोशन गर्नुपर्ने अवस्था आइलागेको छ ।

निर्देशक सन्तोष सेनले फिल्मको प्रमोशन यात्रा सुरु भएको बताएका छन् । फिल्मको प्रमोशनका लागि देशभरका हल र मुख्य स्थानमा ठूला ठूला होर्डिङबोर्ड झुन्ड्याउने काम सुरु भएको छ । सन्तोष सेन फिल्मको आक्रामक प्रमोशनका लागि माहिर छन् । उनलाई नायक प्रदीप खड्काले पनि दरिलो साथ दिनुपर्नेछ ।

२ फरक फिल्म करिब एक महिनाको अन्तरमा रिलिज हुँदा प्रदीपलाई कतै न कतै समस्या परेको छ । प्रदीप ‘प्रकाश’मा आफूलाई कलाकारको रुपमा चिनाउने कसरतमा छन् ।