हलमा फ्यान विभाजित देखेपछि रिसाइन् पूजा

नायिका पूजा शर्मा शनिबार बेलुकी अष्ट्रेलिया उडिन् । फिल्म ‘म यस्तो गीत गाउँछु २’को शोका लागि उनी अष्ट्रेलिया उडेकी हुन् । अष्ट्रेलियाका विभिन्न ३ शहरमा यो फिल्मको शो गरिनेछ । अष्ट्रेलियाको भिसा रिजेक्ट भएको खबर सार्वजनिक भएको केही दिनमै उनी अष्ट्रेलिया उडेकी हुन् ।

कंगारु देश उड्नु अगाडि पूजा फिल्म ‘संझना विर्सना’को प्रचार तथा दर्शक भेटघाटका लागि अष्टनारायण र सिभिल मलमा पुगेकी थिइन् । सामाजिक संजालमा पूजाको एउटा भिडियो भाइरल भैरहेको छ । अष्टनारायण हलमा पूजाले ‘यो एउटा मात्र कलाकारको फिल्म हो’ भन्दै रिसाएको भिडियो टिकटकमा भाइरल भएको छ ।

अष्टनारायण हलमा शनिबार ११ बजेको शो हेर्न ५ सय बढी दर्शक पुगेका थिए । जसमा अधिकांश पूजा र आकाशका फ्यान थिए । तर, फ्यानहरु हलमा स्पष्ट रुपमा विभाजित देखिए ।

कसैले, पूजाको पक्षमा नारा लगाए भने कसैले आकाशको पक्षमा । निर्वाचनको समयमा २ फरक पार्टीका नेता घर दैलोमा गएको समयमा एक्कासी भेट भएको जसरी फ्यानहरु एकले अर्को कलाकारलाई कमजोर बनाउन लागिपरेको देखियो । पूजाका फ्यानले उनको पक्षमा नारा लगाउँदा आकाशका फ्यानले पनि नारा लगाए ।

फ्यानमै स्पष्ट विभाजन देखेपछि पूजा रिसाएकी थिइन् । उनले, एक जना मात्र कलाकारको फिल्म हो भन्दै रिसाएकी थिइन् । उनको रिस आकाशका फ्यानहरुलाई मात्र नभएर आफ्ना फ्यानहरुलाई पनि थियो ।

२ जना कलाकार हलमा पुग्दा एकले अर्कोलाई गिराउने गरि देखिएको फ्यानको व्यवहारले पूजालाई मात्र होइन, आकाशलाई पनि हैरान बनाएको थियो । आकाश र पूजा फ्यानको तानातानमा पर्न वाध्य भए । जसलेगर्दा, मिडियामा अन्तरवार्ता दिनुबाहेक उनीहरु एकसाथ हुनै पाएनन् । जसले, निर्मातालाई तनाव दियो ।

दर्शक तथा फ्यानसँग साक्षात्कार गरेर धन्यवाद दिन कलाकार हल पुग्दा उनीहरुलाई नै होच्याउने तरिकाले नाराबाजी गर्नु गलत कुरा हो । यसले, कलाकारलाई नमज्जा बनाउँछ । यो बिषयमा आकाश बोल्न सकेनन् भने पूजाले आक्रोश पोखेकी थिइन् ।