साढे २२ करोड ग्रस गर्दै ‘कबड्डी ४’लाई मनायो ५१ दिन

नेपाली फिल्मले हलमा ५१ दिन मनाएको सुन्न कमै मात्र पाइन्छ । हलमा फिल्म एक साता पनि राम्रोसँग टिक्दैनन् । यसैले, दर्शक नै आइदिएर हलमा फिल्मले ५१ दिन मनाउनु त दुर्लभ जस्तै भयो । कुनै समय १०१ दिनसम्म फिल्म चलेको भनेर खुबै प्रचार हुन्थ्यो । तर, डिजिटल दुनियाँमा यो सबै कुरा खोज्नु उत्तम नहोला । तर, ५१ दिनको प्रदर्शन गाह्रो हुन थालेको छ ।

तर, जेठको १३ गतेबाट रिलिज भएको फिल्म ‘कबड्डी ४’ले भने ५१ दिनसम्म हलमा दर्शक नै तानेको छ । फिल्म आजबाट ५२ औं दिनमा पनि प्रवेश गरेको छ ।

फिल्मले ५१ दिनमा साढे २२ करोड ग्रस कलेक्शन गरेको निर्माणपक्षले सार्वजनिक गरेको आँकडामा उल्लेख छ । रिलिजको पहिलो दिनदेखि नै नयाँ नयाँ रेकर्ड बनाउँदै फिल्मले ५१ दिनसम्म आइपुग्दा सर्वाधिक कमाई गर्ने फिल्मको रेकर्ड समेत बनाएको छ । यसअघि ‘छक्का पन्जा ३’ले राखेको २० करोडको रेकर्ड यो फिल्मले तोडेको हो ।

रामबाबु गुरुङको निर्देशनमा तयार भएको यो फिल्ममा दयाहाङ राई, सौगात मल्ल, मिरुना मगर, वुद्दि तामाङ, बिजय बराल लगायतका कलाकारको अभिनय छ ।