फिल्मको प्रचार सकेर पूजा भोली अष्ट्रेलिया उड्ने

नायिका पूजा शर्माको अष्ट्रेलियाको भिसा अस्विकृत भएको खबर विभिन्न मिडियामा सार्वजनिक भयो । तर, पूजालाई अष्ट्रेलियाले २ दिन अगाडि नै भिसा दिएको थियो । पूजाको भिसा पर्खाइको सूचीमा रहेकाले स्विकृत हुन केही समय लागेको थियो ।

यसैले, उनले अष्ट्रेलियामा आयोजना भएको बलिउड स्टार गोविन्दाको कार्यक्रममा भने आफ्नो प्रस्तुति दिन पाइनन् । अब, पूजा फिल्म ‘म यस्तो गीत गाउँछु २’को प्रिमियरका लागि भोली अष्ट्रेलिया उड्नेछिन् । पूजाको भिसा पर्खाइमा रहँदा अष्ट्रेलियामा जुलाई ११ तारिखमा फिल्मको शो हुन सकेको थिएन ।

नायिका पूजा शर्माले आफूले फिल्म ‘संझना विर्सना’को प्रचार सकेर मात्र अष्ट्रेलिया जाने तयारी गरेकाले भिसा लागेको २ दिनसम्म बाहिर जानकारी नगराएको बताइन् । उनले, आफू अष्ट्रेलियाको भिसा आएपनि आज शनिबार दर्शकसँग बसेर फिल्मको प्रतिक्रिया लिन उत्साहित भएकाले शुक्रबार नै विदेश नउडेको बताइन् ।

निमेष प्रधानको निर्देशनमा तयार भएको यो फिल्ममा पूजाको साथमा आकाश श्रेष्ठ, छुल्ठिम गुरुङ, शिशिर राणा लगायतका कलाकारको अभिनय छ ।