‘कमेडी हब’मा जम्दै गरेका राधिका र प्रभात

मिडिया हबको निर्माणमा केदार घिमिरेको निर्देशन रहेको कमेडी शो ‘कमेडी हब’ विगत केही सातादेखि एपीवान टेलिभिजनमा प्रशारण भैरहेको छ । यो शोले दर्शकको साथ अपेक्षित पाउन सकिरहेको छैन । यसैले, शोको बिषयमा यसको निर्माण कम्पनी गम्भिर देखिएको छ ।

तर, शोबाट केही कलाकारलाई भने फाइदा भैरहेको छ । रंग पत्रकारितामा सक्रिय रहेका २ संचारकर्मी प्रभात लामा र राधिका कँडेल यो शोबाट जमिरहेका छन् । विभिन्न चरित्रको भूमिका निर्वाहा गर्दै अगाडि बढेका उनीहरुको अभिनयलाई दर्शकले मन पराएका छन् ।

राधिकाले शोमा श्रीमति, एयर होस्टेजदेखि नायिका सुष्मा कार्कीको सम्म अभिनय गर्न भ्याएकी छिन् । सार्वजनिक पछिल्लो भागमा राधिका सुष्माको भूमिकामा देखिएकी छिन् । सुष्माले बोलेका विभिन्न संवादहरु बोल्दै उनी सरकारी कार्यलयको खरदारको भूमिकामा छन् । राधिकाले निर्वाहा गरेको एयर होस्टेज, विदेशी नागरिकको भूमिकालाई पनि दर्शकले रुचाएका थिए ।

यस्तै, ‘कमेडी च्याम्पियन २’मा समेत सहभागी भएका प्रभात लामाले कहिले राजेन्द्र खड्गी त कहिले पुण्य गौतमको नक्कल उतारेका छन् । राधिका सुष्मा कार्कीको भूमिकामा देखिएको भागमा प्रभात पुण्यको भूमिकामा देखिएका छन् ।

यो शोमा व्यस्त भएपछि राधिका र प्रभातलाई अन्य शोबाट समेत राम्रो अफर आउन थालेको वुझिएको छ । तर, उनीहरुले आफ्नो मिडियाकर्मलाई भने सक्रिय रुपमा अगाडि बढाउन पाएका छैनन् ।