टिकटकमा भाइरल ‘झिँगे दाउ’को ‘आगो बिना’ गीत

अर्जुन पोखरेलको संगीत, शान्तीश्री परियार र प्रविण वेडवालको स्वर, मुक्त उदासको संगीतमा तयार भएको फिल्म ‘झिँगे दाउ’को ‘आगो बिना’ बोलको गीतले दर्शकको मन जितिरहेको छ । सार्वजनिक भएको ५ दिनमा ७ लाख भन्दा बढी युट्युबमा भ्यूज पाएको यो फिल्मलाई ज्ञानेन्द्र देउजाले निर्देशन गरेका हुन् । यो गीतको अडियोले टिकटकमा समेत हंगामा मच्चाइरहेको छ ।

सार्वजनिक भएको ४ दिनसम्म ६५ हजार भन्दा बढीले यो गीतको टिकटक बनाएका थिए । तर, एकै दिनमा हिजो मात्र ६५ हजार भन्दा बढीले टिकटक बनाएका छन् ।

गीतको १ लाख ३५ हजार भन्दा बढी पटक टिकटक बनेको भन्दै निर्देशक देउजाले गीतसंगीतमा पनि फरक स्वाद पस्कने हो भने दर्शकले रुचाउने बताए । फिल्मको अडियोलाई दर्शकले रुचाइरहँदा भिडियोमा भने औषत प्रतिक्रिया आएको छ ।

भिमनिधी तिवारीको चर्चित कृति ‘झिँगे दाउ’बाट तयार पारिएको यो फिल्ममा केकी अधिकारी, मुकुन भुषाल, आँचल शर्मा र कुशल बिष्टको मुख्य भूमिका छ । यो फिल्म भदौको १७ गतेबाट रिलिज हुँदैछ ।