बकर इदमा हसनको आग्रह–‘जनावर काटमारको तस्वीर पोष्ट नगर्नुहोस्’

आज बकर ईद । विश्वभरका मुस्लिम धर्माबलम्बीहरुले बकर ईदलाई धुमधामसँग मनाइरहेका छन् । नेपाल सरकारले पनि बकर ईदको अवसरमा सार्वजनिक बिदा दिएको छ । नेपाली फिल्मका नायक तथा निर्माता हसनराजा खानले पनि बकर ईदलाई धुमधामसँग सेलिब्रेशन गरिरहेको बताएका छन् ।

तर, उनले ईदमा जनावरको काटमार गर्दा सामाजिक संजालमा पोष्ट नगर्न अपिल गरेका छन् । उनले सामाजिक संजालमा एक भिडियो पोष्ट गर्दै भनेका छन्–‘जनावरको काटमार गरेको भिडियो र तस्वीर पोष्ट गर्दा अरुको भावनामा ठेस पुग्न सक्छ । कतिपयलाई यस्तो कुरा मन नपर्न पनि सक्छ ।’

उनले आफू खुशी हुँदा अरुको भावनालाई पनि ठेस पुर्याउन नहुने बताएका छन् । साथै, हसनले यस्ता तस्वीर पोष्ट गरेर अरुको भावनालाई चोट पुर्याउँदा अल्ला खुशी नहुने समेत बताएका छन् ।

फिल्म ‘रोमियो’को निर्माण तथा अभिनय गरेपछि हसनले नयाँ फिल्म निर्माण गरेका छैनन् । उनले, चाडै नै नयाँ फिल्मको काम अगाडि बढाउने बताएका छन् ।