सौगात मल्लले ‘एक्स ९’ अब नगर्ने

मुकुन्द भट्टको निर्देशनमा तयार हुन लागेको फिल्म ‘एक्स ९’ अब नायक सौगात मल्लले नगर्ने भएका छन् । यो फिल्मको छायांकन फ्रेबुअरीमै गर्नुपर्ने थियो । यही सेड्यूललाई लिएर नायक अनमोल केसी, पुष्प खड्का, सौगात मल्ल लगायतले जिममा मिहिनेत पनि गरेका थिए ।

तर, विविध कारण देखाउँदै मुकुन्दले फिल्मको काम अगाडि बढाउन सकेनन् । यसपछि, कलाकारहरु पनि अन्य फिल्ममा जोडिए ।

तर, अब फेरि मुकुन्द फिल्म बनाउन अगाडि सरेका छन् । वुझिएअनुसार, नायक अनमोल केसी र पुष्प खड्का काम गर्न तयार छन् । तर, सौगात मल्लले भने फिल्ममा काम नगर्ने भएका छन् । मेरो फिल्मसँगको भेटमा सौगातले भने–‘फिल्म फेरि बन्ने कुरा भएको छ । तर, अब गर्दिनँ होला । मेरो अब समय मिल्दैन । कार्तिकबाट म अर्को एक प्रोजेक्टमा व्यस्त हुन्छु । भदौ १० गतेसम्म अरु फिल्ममा काम गर्दिनँ ।’

सौगातले निर्माण गरेको फिल्म ‘राधा’ भदौको १० गतेबाट रिलिज हुँदैछ । यसैले, सौगातले यो फिल्म रिलिज अगाडि अरुमा काम नगर्ने बताएका छन् ।