Exclusive: ‘भागवत गीता’मा सुहानाको जोडी धिरज, दयाहाङ पनि पक्का

साउनबाट छायांकनमा जाने तयारीमा रहेको फिल्म ‘भागवत गीता’को टिजर केही दिनमा सार्वजनिक हुँदैछ । फिल्मको टिजर खिचेर यसको निर्देशक झरना थापा, नायिका सुहाना थापा र निर्माता सुनिल कुमार थापा अमेरिका गएका थिए । उनीहरु केही दिन अगाडि मात्र अमेरिकाबाट फर्किएका छन् ।

फिल्मको छायांकन सुरु हुने दिन नजिकिदै गर्दा कलाकार को होलान् भन्ने कौतुहलता दर्शकमा छ । तर, मेरो फिल्मलाई प्राप्त खबर अनुसार, यो फिल्ममा नायिका सुहाना थापाको जोडीको रुपमा नायक धिरज मगरले काम गर्ने पक्का छ ।
धिरजले फिल्म साइन गरिसकेको श्रोतले बतायो । यस्तै, फिल्ममा नायक दयाहाङ राइले पनि काम गर्नेछन् । दयाहाङ राइको भूमिकाको बारेमा भने केही पनि खुलेको छैन ।

फिल्मलाई अन्तरजातिय प्रेमकथामा निर्माण गर्ने तयारी झरनाको छ । भागवत र गीताको प्रेमकथामा यो फिल्म बन्न लागेको हो । लामो समयदेखि सुहानाले धिरजसँग काम गर्ने इच्छा व्यक्त गर्दै आएकी थिइन् । अब भने सुहानाको धिरजसँग काम गर्ने चाहना पुरा भएको छ ।

सुहानाले अभिनय गरेको फिल्म ‘ए मेरो हजुर ३ र ए मेरो हजुर ४’ बक्स अफिसमा हिट भएको थियो ।