स्वस्तिमाको फिल्मी करिअरः नायिका दौडदै, निर्माता घिस्रदै

नायिका स्वस्तिमा खड्का आज आफ्नो जन्मदिन मनाउँदैछिन् । नेपाली फिल्म क्षेत्रमा छोटो समयमा नै लोकप्रियता हासिल गरेकी यी नायिकालाई सवैभन्दा पहिले त, जन्मदिनको शुभकामना ।

फिल्म ‘होस्टेल रिटन्र्स’मा काम गर्दा स्वस्तिमा आफैले पनि करिअर यति चाडो दौडिएला भन्ने सोचेकी थिइनन् । तर, निर्माता र ब्यानरको एकपछि अर्को विश्वासले उनलाई फिल्म क्षेत्रमा सर्वाधिक चर्चित नायिकाको सूचीमा राखिदिएको छ ।

स्वस्तिमाले अभिनय गरेका ‘छक्का पन्जा २ र नाई नभन्नु ल ५’ बक्स अफिसमा हिट छन् । तर, यी फिल्म स्वस्तिमाकै नामले हिट भएका भने होइनन् । आजबाट २७ बर्षमा प्रवेश गरेकी स्वस्तिमाले अभिनय गरेका पछिल्ला ४ वटा फिल्म लगातार असफल भए । ‘हजार जुनी सम्म, घामड शेरे, चपली हाइट ३, चिसो मान्छे’ जस्ता फिल्म स्वस्तिमाको नामले चलेनन् ।

स्वस्तिमलाई ‘बुलबुल’ फिल्मले कलाकारको रुपमा स्थापित गरेको हो । ‘चिसो मान्छे’सम्म आइपुग्दा उनको अभिनयको तारिफ भैरहेको छ । यसअर्थमा स्वस्तिमाको करिअर दौडिरहेको छ । तर, स्वस्तिमा दौडिरहँदा उनले खेलेका फिल्मका निर्माता भने घिस्रिनु परेको छ । स्वस्तिमा हिट, फिल्म भने फ्लपको श्रृङ्खला रोकिएको छैन । यसअर्थमा उनी भाग्यमानी नायिका समेत हुन् ।

७ बर्ष अगाडि निर्देशक निश्चल बस्नेतसँग उनले बिहे गरेकी थिइन् । स्वस्तिमाले अभिनय गरेको ‘कुटुमा कुटु’ बोलको गीत युट्युबमा सबैभन्दा बढी हेरिएको भिडियो समेत हो । राष्ट्रिय चलचित्र पुरस्कार र केही विदेशी अवार्ड समेत जितिसकेकी यी नायिका करिअरको उच्च विन्दुमा छिन् ।

नेपाली फिल्म क्षेत्रकी सफल नायिकालाई जन्मदिनको धेरै धेरै शुभकामना ।