‘भष्मे डन’का लागि विपिन ‘पशुपति प्रसाद २’बाट टाढा भएका हुन् ?

केही दिनयता नायक विपिन कार्की विभिन्न कारणले मिडियामा छाएका छन् । विपिनले उच्च पारिश्रमिक लिने गरेकोदेखि बलिउड फिल्ममा काम गर्न लागेको खबरले उनको चर्चा खुबै छ । केही साता अगाडि विपिन फिल्म ‘पशुपति प्रसाद २’मा नखेल्ने खबर बाहिरिएको थियो । विपिनले महंगो पारिश्रमिक मागेपछि उनी फिल्ममा नरहने भएको खबर बाहिरिएको थियो ।

तर, फेरि उनकै बारेमा नयाँ खबर बाहिरिएको छ । त्यो हो, ‘भष्मे डन’ । फिल्म ‘पशुपति प्रसाद’बाट उदाएको पात्र हो ‘भष्मे डन’ । यो पात्रले विपिनलाई पनि स्थापित गरायो ।

वुझिएअनुसार, निर्देशक दीपेन्द्र के खनाल यही नाममा फिल्म बनाउने तयारीमा छन् । जसमा विपिनको मुख्य भूमिका रहनेछ । शिर्ष भूमिकामा नै फिल्म खेल्ने तयारी विपिनले गरेका कारण पनि उनी सहायक भूमिकाका लागि ‘पशुपति प्रसाद २’मा रुची नराखेको वुझ्न सकिन्छ । फिल्ममा शर्मिला पाण्डेको समेत लगानी रहनेछ ।

यो बिषयमा विपिनले नै मिडियालाई जानकारी दिएका छन् । तर, निर्देशक खनाल भने यस बिषयमा अनविज्ञता प्रकट गर्छन् ।