जन्मदिन विशेषः ‘बाबरी’ अदिती

सामाजिक संजाल इन्स्टाग्राममा सबैभन्दा धेरै फलोअर्स भएकी नायिका हुन् अदिती वुढाथोकी । विश्वभर रहेका २० लाख भन्दा बढीले उनलाई फलो गरेका छन् । फलोअर्सको तुलानामा उनको छेउमा पनि नेपाली फिल्मका कुनै कलाकार पुग्न सकेका छैनन् ।

तर, करिअर सुरु गरेको करिब ५ बर्षमा उनले २ वटा मात्र फिल्ममा काम गरेकी छिन् । ‘कृ’की नायिका भनेर चिनिएकी अदिती अब आफूलाई ‘बाबरी’को रुपमा चिनाउने तयारीमा छिन् ।

अदिती अभिनित फिल्म ‘बाबरी’ भदौको ३१ गतेबाट रिलिज हुँदैछ । यो फिल्मको शिर्ष गीतले दर्शकको मन जितिसकेको छ । टिजर पनि हिट भैसकेको छ । यसअर्थमा, यो फिल्मको व्यापार सुखद हुने अपेक्षा गर्न सकिन्छ ।

फिल्ममा अदिती शिर्ष भूमिकामा भएकाले पनि, फिल्म रिलिजपछि उनलाई दर्शकले ‘बाबरी’ भनेर बोलाउन सक्छन् । यो फिल्म चलेको खण्डमा उनको माग फिल्म क्षेत्रमा बढ्ने निश्चित छ । नायिकाको संकट पर्दै गएको फिल्म क्षेत्रमा अदिती भरपर्दो विकल्पको रुपमा उदाउन सक्छिन् ।

सामाजिक संजालमा बोल्ड फोटो पोष्ट गरेर सधै नै चर्चामा आउने उनी मुम्बईमा बसेर मोडलिङ गर्दै आएकी छिन् । एक नेपाली चेलीका विश्वकै आँखा लागेको मुम्बई नगरीमा यो सफलता आफैमा लोभलाग्दो छ । तर, अदितीले नेपाली फिल्म क्षेत्रमा सफलता पायन् भने उनका लागि अझै विशेष हुनेछ ।

अदिती आज आफ्नो जन्मदिन मनाउँदैछिन् । उनलाई जन्मदिनको धेरै धेरै शुभकामना ।