जितु नेपाल, ‘छक्का पन्जा’का निर्मातासँग मिलेर फिल्म बनाउँदै

हाँस्य कलाकार जितु नेपाल नयाँ फिल्म निर्माणमा लागेका छन् । उनले निर्माण गर्न लागेको नयाँ फिल्मको स्क्रिप्टमा काम भैरहेको छ । दीपकराज गिरी र दीपाश्री निरौलाको टिमबाट अलग भएपछि जितुले आफ्नै लगानीमा फिल्म बनाउन लागेका हुन् ।

तर, रोचक कुरा के छ भने जितुले ‘छक्का पन्जा’ निर्माणमा टिमअप गरेर अहिले दीपकराजको टिमबाट अलग भएका निर्मातालाई पनि एकसाथ लिएर अगाडि बढ्ने तयारी गरेका छन् । निर्माताद्धय सुमन गिरी र निशान बजगाँइले फिल्म निर्माणमा जितुलाई सघाउनेछन् । फिल्मको निर्देशन भने दिनेश डीसीले गर्ने पक्का भएको छ ।

‘सर्वजीत’ नामक फिल्मको निर्देशनपछि दिनेशले यो फिल्मको निर्देशन गर्नेछन् । फिल्ममा कलाकार को हुने भन्ने बिषयमा फाइनल नभएको निर्माता सुमन गिरीले मेरो फिल्मलाई जानकारी दिए ।

दीपक–दीपा नयाँ फिल्मको तयारीमा लागेको समयमा जितु नेपाल नयाँ कमेडी फिल्मको तयारीमा लागेका छन् ।