लकडाउनमै फिल्म घोषणा गरेका रेखा र रोज मौन

पहिलो चरणको लकडाउन भैरहँदा नेपाली फिल्म क्षेत्र अब के होला भन्ने अन्यौल थियो । फिल्म बनाउनका लागि कोही पनि अगाडि सरेका थिएनन् । सो समयमा केही फिल्मीकर्मीले फिल्मको घोषणा गरे ।

जसमध्ये एक थिइन्, नायिका तथा निर्मात्री रेखा थापा । रेखा थापाले सौगात मल्ल र दयाहाङ राईलाई लिएर फिल्म बनाउने घोषणा गरिन् । तर, रेखाको फिल्म घोषणा अझै पनि अन्यौलमा नै छन् । यसविचमा, उनले केही फिल्म बनाउन लागेका कुरा सार्वजनिक भए । तर, ती सबै प्रोजेक्ट अगाडि बढ्न सकेनन् ।

निर्माता रोज राणाले पनि सोही समयमा ‘खलनायक २’ बनाउने घोषणा गरेका थिए । नयाँ पुस्ताका कलाकारलाई लिएर फिल्म बनाउने घोषणा गरेका रोज अहिले मौन छन् । उनी र रेखाले फिल्म बनाउने घोषणा गरेको २ बर्ष हुन लागिसक्यो । यसपछि, दर्जनौ फिल्म निर्माण भएर प्रदर्शनमा आइसकेका छन् । तर, रेखा र रोजको फिल्म घोषणामा नै सिमित छ ।