भिडियोका लागि खिचिएको ‘ए मेरो हजुर’ ‘कृष्णलीला’को गीत कसरी बन्यो ?

नायक पुष्प खड्का र नायिका श्रद्धा क्षेत्रीको मुख्य भूमिका रहेको फिल्म ‘कृष्णलीला’ भदौको ३ गतेबाट रिलिज हुँदैछ । यो फिल्मलाई दिपक वलीले निर्देशन गरेका हुन् । यो फिल्मको गीत र ट्रेलर सार्वजनिक भैसकेको छ, जसलाई दर्शकले अत्याधिक मन पराएका छन् ।

यसैविच, फिल्मको निर्माण टिमले शुक्रबार ‘ए मेरो हजुर’ बोलको गीत सार्वजनिक गर्ने तयारी गरेको छ । माइकल चन्दको निर्देशनमा तयार भएको यो गीतको भिडियोलाई निक्कै आकर्षक तरिकाले खिचिएको छ । तर, यो गीतलाई सुरुवातमा यही फिल्मकै लागि भनेर तयार पारिएको होइन । डीआर उपाध्यायले लेखेको गीतलाई माइकल चन्दले भिडियोको रुप दिएका हुन् ।

तर, भिडियो तयार भैसकेपछि ‘कृष्णलीला’को टिमले गीत र भिडियो दुबै मन परायो । कलाकार पनि फिल्मकै भएका कारण उनीहरु फिल्ममा गीत राख्नका लागि तयार भएका हुन् ।

रोमान्टिक शैलीको यो गीतलाई माइकल चन्दले गज्जबको दृश्य कैद गर्दै निर्देशन गरेका छन् । गीतले दर्शकको मन जित्ने विश्वास गरिएको छ ।