तिहारमा ३ नेपाली, २ बलिउड फिल्म

यो बर्षको तिहारलाई लक्षित गर्दै ३ नेपाली फिल्मको प्रदर्शन मिति तय गरिएको छ । यस्तै, यही मितिमा २ वटा हिन्दी फिल्म आउने निश्चित भएको छ । यसरीहेर्दा, तिहारमा पनि नेपाली बक्स अफिस गर्मिने निश्चित छ ।

यो बर्षको तिहारमा फिल्म रिलिज गर्ने घोषणा निर्माता किरण नेपालीले केही महिना अगाडि नै गरे । दीपेन्द्र लामाको निर्देशनमा बनेको फिल्म ‘२ नम्बरी’ कार्तिक ४ गतेबाट रिलिज हुने पक्का छ । फिल्ममा दयाहाङ राई, सौगात मल्ल, उपासना सिंह ठकुरी, उगेन छोदेनको मुख्य भूमिका छ ।

यस्तै, कार्तिकको ४ गतेबाट रिमेश अधिकारीको निर्देशनमा बनेको फिल्म ‘नालापानी’ले पनि प्रदर्शन मिति तय गरेको छ । ‘नालापानी’को युद्धमा नेपाली विरहरुले देखाएको विरताको कथा फिल्ममा छ । यस्तै, कार्तिको ६ गतेबाट सुरज पाण्डेको निर्देशन तथा शर्मिला पाण्डेको निर्माणमा तयार भएको फिल्म ‘परस्त्री’ पनि रिलिज हुने पक्का छ । फिल्ममा कोशिश क्षेत्री र शिल्पा मास्केको मुख्य भूमिका छ ।

तिहारमै नायक अक्षय कुमारको ‘राम सेतु’ र अजय देवगणको ‘थ्यांक गड’ पनि रिलिज हुने पक्का भएको छ । यसरीहेर्दा, यसबर्षको तिहारमा नेपाली फिल्मलाई सहज हुने देखिदैन ।