‘चिसो मान्छे’लाई सुखद प्रतिक्रिया, औषत सुरुवात

आजबाट देशभरका हलमा रिलिज भएको नेपाली फिल्म ‘चिसो मान्छे’लाई समीक्षकबाट सुखद प्रतिक्रिया मिलेको छ । दीपेन्द्र के खनालको छायांकन, लेखन तथा निर्देशनमा तयार भएको फिल्मको प्रस्तुति, कलाकारको अभिनयलाई समीक्षकले मन पराएका छन् । स्वस्तिमा खड्का, अर्पण थापा, देशभक्त खनाल लगायतका कलाकारको अभिनय रहेको यो फिल्मलाई शर्मिला पाण्डेले निर्माण गरेकी हुन् ।

फिल्मको समीक्षा सुखद आएपनि यसको सुरुवाती व्यापार भने औषत छ । आज यो फिल्मले देशभरका हलमा औषत व्यापार गर्यो । फिल्मले अब वर्ड अफ माउथको भर पर्नुपर्नेछ । दर्शकले फिल्मलाई राम्रो भनेको खण्डमा दीपेन्द्र के खनालका अघिल्ला फिल्म जस्तै यसले व्यापारको गीत बढाउन सक्छ ।

अघिल्लो फिल्म ‘चपली हाइट ३’ फ्लप भएकाले पनि यो फिल्म स्वस्तिमाका लागि चल्न आवश्यक छ । किनकी, समीक्षक र फिल्मीकर्मीबाट राम्रो तारिफ पाइरहेकी स्वस्तिमालाई अझै पनि दर्शकको ठूलो संख्याले बक्स अफिसमा स्विकार गरिरहेको छैन ।