‘चपली हाइट ३’ पुनः तेस्रो पटक प्रदर्शन हुने !

फिल्म ‘चपली हाइट ३’ तेस्रो पटक प्रदर्शन हुने भएको छ।

गत वर्ष पुस र फागुनमा प्रदर्शनमा आएको फिल्म कोरोनाको तेस्रो लहरका कारण तीन दिन मात्र प्रदर्शन भएको थियो। सरकारले संक्रमणका कारण निषेधाज्ञा लगाउँदा हलमा प्रदर्शनका क्रममा रोकिएको फिल्म ‘चपली हाइट ३’लाई पुनः प्रदर्शन गर्न लागिएको हो।

पुस अन्तिममा प्रदर्शन थालेलगत्तै कोरोनाको तेस्रो लहर शुरु भएपछि एक महिना सबै फिल्म हल बन्द भएका थिए। पछि हल खुलेपछि फागुनमा प्रदर्शनमा आएको फिल्ममा दर्शकको उपस्थिति भने न्यून थियो। कोरोनाका कारण धेरै दर्शकले फिल्म हेर्न नपाएको भन्दै निर्माण टोली फिल्म पुनः प्रदर्शन गर्ने तयारीमा जुटेको छ।

फिल्मका निर्माता अर्जुन कुमारका अनुसार फिल्म त्यतिबेला राम्रोसँग चल्न नपाएकाले फेरि प्रदर्शन गर्न लागिएको हो। फिल्म निषेधाज्ञाका कारण हेर्न चाहेर पनि बञ्चित भएका दर्शकले पुनः हेर्ने अवसर पाउने उनले बताएका छन्।

कहिलेदेखि प्रदर्शनमा ल्याउने भन्नेबारे छलफल भइरहेको छ। सम्भवत असार महिना भित्रै प्रर्दशन गर्ने तयारी रहेको निर्माता अर्जुन कुमारले जानकारी दिएका छन् ।

साथै आगामी जुलाईमा ‘चपली हाइट ३’ अमेरिकामा पनि प्रदर्शन हुने मिति सार्वजनिक भएको छ।  न्युयोर्कमा रहेको बम्बे थिएटरमा जुलाई १० मा फिल्म प्रदर्शन हुन लागेको हो।

यो फिल्म ‘चपली हाइट’ फिल्म श्रृङ्खलाकै निरन्तरता हो। अर्जुन कुमारको निर्माणमा बनेको फिल्मलाई निकेश खड्काले निर्देशन गरेका हुन्। फिल्ममा स्वस्तिमा खड्का, महेश त्रिपाठी, आमिर गौतम, सुपुष्पा भट्टलगायत कलाकारको मुख्य भूमिका रहेको छ।