दयासँग तुलना हुँदा खुशी धिरज, तर अनमोलको बारे बोलेनन्

नायक धिरज मगरको नयाँ फिल्म ‘बाबरी’को शिर्ष गीत मंगलबार सार्वजनिक गरियो । मंगलबार सार्वजनिक गीतमा धिरज र अदिती वुढाथोकीको रोमान्स छ । गीत सार्वजनिक अगाडि फिल्मको टिजर पनि रिलिज भएको थियो । टिजरमा धिरजको आवाजलाई लिएर खुबै चर्चा भयो । कतिपयले उनको आवाज दयाहाङ राइको त होइन भने आशंका पनि व्यक्त गरे ।

तर, गीत रिलिज कार्यक्रममा यो कुरालाई स्पष्ट पार्दै धिरजले आवाज आफ्नै भएको सुनाए । उनले, यसका लागि १५ दिन डबिङ गर्न समय लागेको बताए । नायक दयाहाङ राइसँग तुलना भएको बिषयमा धिरज खुशी देखिए । उनले भने–‘म त बल्ल २ वटा फिल्ममा काम गर्दैछु । दयाहाङ राई जस्तो कलाकारसँग तुलना हुनु मेरो लागि खुशीको कुरा हो ।’

सार्वजनिक गीतको भिडियोमा नायक अनमोल केसीको शैली आएको भन्ने कुरा समेत उठ्यो । यो बिषयमा भने धिरजले खासै बोल्न चाहेनन् । धिरजलाई अनमोलको प्रतिस्पर्धीको रुपमा हेरिन्छ । यसैले, पनि अनमोलको बिषयमा धिरजले केही पनि नबोलेको हुनुपर्छ ।

भदौको ३१ गतेबाट रिलिज हुन लागेको यो फिल्मलाई सुरेन्द्र पौडेलले निर्देशन गरेका हुन् ।