‘बाबरी’को शिर्ष गीत उत्कृष्ट, जम्यो धिरज र अदितीको केमेष्ट्री

अनमोल गुरुङको स्वर, शब्द तथा संगीतमा तयार भएको फिल्म ‘बाबरी’को शिर्ष गीत सार्वजनिक गरिएको छ । काठमाडौंमा पत्रकार सम्मेलनको आयोजना गर्दै सार्वजनिक गरिएको गीतमा अस्मिता अधिकारीको पनि स्वर छ । यो फिल्मको गीत उत्कृष्ट छ । सिक्किमका रमणीय लोकेशनमा खिचिएको गीतको भिडियो पनि मनमोहक छ । कोरियोग्राफरले कलाकारलाई नयाँ शैलीमा नचाउन नसकेपनि भिडियोको मेकिङ, छायांकनले त्यो कुरा विर्साइदिन्छ ।

सुरेन्द्र पौडेलको लेखन, सम्पादन तथा निर्देशनमा तयार भएको फिल्मको गीतको भिडियोमा नायक धिरज मगर र नायिका अदिती वुढाथोकीलाई फिचरिङ गरिएको छ । गीतको भिडियोमा दुइको जोडी गज्जबले जमेको छ ।

फिल्म ‘इन्टु मिन्टु लण्डनमा’पछि धिरज पर्दामा देखिदैछन् भने अदितीले ‘कृ’पछि होम प्रोडक्शनको फिल्मबाट आफूलाई दर्शकमाझ ल्याउन लागेकी हुन् । सिजन दाहाल, रिता बोहरा, किशोर नेपाल र मनोज त्रिपाठी यो फिल्मका लेखक हुन् । पुष्पलता बुढाथोकी र गणेश वुढाथोकी निर्माता रहेको फिल्मकी सह–निर्मात्री सुष्मा गुरुङ हुन् । नरेन्द्र मैनालीको छायांकन रहेको चलचित्रमा अन्जिला खत्री र विक्रम लामाको कोरियोग्राफी छ ।

यो फिल्म भदौ ३१ मा रिलिज हुँदैछ । यो फिल्म चलेको एक सातापछि फिल्म ‘प्रेमगीत ३’ रिलिज हुँदैछ । यसैले, यो फिल्मका निर्माताले प्रदर्शन मितिबारे भने एकपटक सोच्न आवश्यक छ ।