सौगात र श्रृष्टीको ‘माइकल अधिकारी’ भदौ ३ मा रिलिज हुने

नायक सौगात मल्ल र नायिका श्रृष्टी श्रेष्ठको मुख्य भूमिका रहेको फिल्म ‘माइकल अधिकारी’को प्रदर्शन मिति तय गरिएको छ । यो फिल्म अब भदौको ३ गतेबाट रिलिज हुने पक्का भएको छ । यो मितिमा फिल्म ‘कृष्णलीला र प्रेमगञ्ज’ पनि रिलिज हुँदैछन् । सौगात स्टारर फिल्म पनि भदौ ३ मा नै आएपछि यो मितिमा ३ वटा फिल्म रिलिज हुने पक्का भएको छ ।

यसअघि वि.सं २०७६ सालको चैत्र २८ लाई यो फिल्मको मिति तोकिएको थियो । तर, कोरोनाका कारण लकडाउन भएपछि फिल्मको प्रदर्शन मिति स्थगीत भएको थियो । गोपिकृष्ण मुभिजको ब्यानरमा निर्माण भएको फिल्ममा सौगात र श्रृष्टीका अनुसार अशान्त शर्मा, ऐनी कुँवर, हेमन्त बुढाथोकी, विद्या कार्की, सुजना ढकाल, दिलिप बोहराको मुख्य भूमिका छ ।

रञ्जिन रौनियारले निर्देशन गरेको यो फिल्मले कोख भाडामा लिएर सन्तान जन्माउने कथालाई उठान गरेको छ । यो फिल्ममा आर्थिक अवस्था कमजोर भएकाले पैसाको लागि अरुको बच्चा जन्माउने विवाहित महिलाको भूमिकामा श्रृष्टी देखिएकी छिन् । फिल्मको सम्पुर्ण छायांकन इलाम र झापामा गरिएको छ ।