के सुदर्शन थापाले ‘प्रसाद २’ निर्देशन गर्न लागेका हुन् ?

फिल्म ‘प्रसाद २’ निर्माणको घोषणा भएको लामो समय भैसकेको छ । तर, अझै पनि यो फिल्मको छायांकन सुरु हुने सकेको छैन । हिट फिल्म ‘प्रसाद’को प्रिक्वेलको रुपमा तयार हुन लागेको फिल्मको कथा सुशिल पौडेलले लेखेका हुन् ।

यो फिल्मलाई सौरभ चौधरीले निर्देशन गर्ने पक्का भएको थियो । ‘प्रसाद’का निर्देशक दिनेश राउतले सिरिजमा मन नबनाएपछि निर्माता सुभाष थापाले सौरभसँग काम अगाडि बढाएका थिए ।

सौरभले फिल्मको कथा फाइनल गर्नेदेखि लोकेशन समेत हेरिसकेका थिए । तर, अब यो फिल्मबाट सौरभ बाहिरिएका छन् । उसो भए, फिल्मको निर्देशन अब कसले गर्छ त ?यो फिल्मलाई निर्देशक सुदर्शन थापाले निर्देशन गर्न लागेको खबर बाहिरिएको छ । तर, वुझिएअनुसार सुदर्शनले फिल्म साइन गरिसकेका छैनन् । यो बिषयमा सुदर्शन र सुभाषविच कुरा अगाडि बढेको भने छ ।

सुदर्शनले फिल्म साइन गर्छन् या गर्दैनन् पक्का भएको छैन । नेपाली फिल्म क्षेत्रमा लभ स्टोरी फिल्म निर्देशनका बादशाह मानिएका सुदर्शन थापाले निर्देशन गरेको पछिल्लो फिल्म ‘म यस्तो गीत गाउँछु २’ सुपरहिट भएको थियो ।
यो फिल्ममा विपिन कार्की, नम्रता श्रेष्ठ, निश्चल बस्नेतको मुख्य भूमिका रहनेछ ।