‘छक्का पन्जा ४’मा नयाँ नायिका ?

असारको पहिलो साताबाट फिल्म ‘छक्का पन्जा ४’को छायांकन सुरु गर्ने तयारीमा रहेका निर्माता दीपकराज गिरीले कलाकारको लाइनअप भने अझै फाइनल गरेका छैनन् । फिल्ममा दीपाश्री निरौलाको निर्देशन रहने पक्का छ । फिल्ममा दीपकराज गिरी, केदार घिमिरे, वुद्दि तामाङ, विल्सन विक्रम राई लगायतका कलाकारको अभिनय रहनेछ ।

फिल्मका लागि नायिका अझै पनि फाइनल गरिएको छैन । तर, वुझिएअनुसार फिल्मका लागि यसपटक नयाँ नायिका राख्ने तयारी यसको निर्माणपक्षले गरेको छ ।

यसअघिका सबै फिल्ममा दीपक र उनको टिमले नाम चलेका नायिका नै राखेको थियो । नीता ढुंगाना, प्रियंका कार्की, वर्षा राउत, स्वस्तिमा खड्का, नम्रता सापकोटा, दिपिका प्रसाँई, केकी अधिकारीलाई नै फिल्ममा राखेका दीपकले यसपटक नयाँ अनुहार भित्राउने तयारी गरेका छन् । तर, नयाँ अनुहारको नाम सार्वजनिक गरिएको छैन ।

फिल्मको छायांकन अगाडि कलाकारको लाइनअप सार्वजनिक गर्ने तयारी उनको छ । फिल्मलाई दशैंमा रिलिज गर्ने सोच समेत दीपकको छ ।