‘प्रकाश’लाई लिएर गम्भिर देखिए प्रदिप

नायक प्रदिप खड्का आफ्नो नयाँ फिल्म ‘प्रकाश’लाई लिएर गम्भिर देखिएका छन् । भदौको १० गतेबाट रिलिज हुने यो फिल्म बक्स अफिसमा पनि चल्न आवश्यक छ । यो फिल्मको लागि आफूले मिहिनेत नै छुट्टै खालको गरेको भन्दै प्रदिपले दर्शकको माया पाउनेमा विश्वास व्यक्त गरेका छन् ।

प्रदिपले सामाजिक संजालमा लाइभ आएर होस् या स्टाटस मार्फत नै किन नहोस्, यही फिल्मको कुरा बढी गर्ने गर्छन् ।

उनी लेख्छन्–‘यो फिल्ममा काम गर्ने क्रममा कला र कलाकारिता प्रतिको हेर्ने दृष्टिकोण नै परिवर्तन आएको छ । एउटा पात्र मार्फत सम्पूर्ण कथा नै जीवन्त भइदिन सक्छ भन्ने मान्यतालाई आत्मसाथ गर्दै पात्रलाई न्याय गर्न उसको वस्तुस्थितीदेखि भावनाहरु समेतलाई वुझ्ने हेतुले मैले जुम्लेली लवज सिक्नेदेखि पात्र अध्ययनका लागि चलचित्र कार्यशालामा कैयौं दिनहरु बिताएको छु । सोही क्रममा एउटा कलाकारले पात्र र कलाकारितालाई कसरी लिनुपर्दछ भन्ने मेरो सोचमा नै आयाम थपिएको महशुश गरेको छु ।’

दिनेश राउतको निर्देशनमा तयार भएको यो फिल्म रिलिज भएको एक महिनापछि प्रदिपकै रोमान्टिक फिल्म ‘प्रेमगीत ३’ रिलिज हुँदैछ । प्रदिप भने ‘प्रकाश’को व्यापार र दर्शकको प्रतिक्रियामा बढी केन्द्रित छन् ।