‘प्रकाश’को टिजरमा प्रदिप र दियाको लोभलाग्दो अभिनय

फिल्म ‘प्रकाश’को टिजर हलमा वैशाख १ गते नै आएको हो । हलमा टिजर सार्वजनिक भएको डेढ महिनापछि यसलाई युट्युबमा रिलिज गरिएको छ । भदौ १० गतेबाट यो फिल्म रिलिज हुनेछ । फिल्मको टिजरमा मुख्य कलाकारहरु दिया मास्के र प्रदिप खड्कालाई देखाइएको छ ।

कर्णालीको परिवेशमा उनीहरुको पहिरन, संवाद र शैलीले दर्शकलाई आकर्षित गर्न सक्छ । जनयुद्धका कारण वेपत्ता आफ्ना श्रीमान् र पितालाई पर्खिरहेका परिवारको कथामा यो फिल्म बनेको छ । साथमा फिल्मले सरकारी स्कुलको जागिर खानका लागि एक यूवाले गर्ने संघर्ष पनि भन्छ । विकास सुवेदीको लेखनमा तयार भएको फिल्मलाई ‘प्रसाद’ फेम्ड निर्देशन दिनेश राउतले निर्देशन गरेका हुन् ।

फिल्ममा रेनु योगी, प्रकाश घिमिरे, निरज पन्थी, गोविन्द सुनुवार, रामबाबु रेग्मी, लोकेन्द्र लेखक, दिपेन्द्र शाही लगायतका कलाकारको मुख्य भूमिका छ ।

बिनिस इन्टरटेन्मेन्टको ब्यानरमा निर्माण भएको फिल्ममा राजेश श्रेष्ठको छायांकन, जीवन थापाको सम्पादन, सुवास भुषाल, दीपक शर्मा, ताराप्रकाश लिम्बु र एलिस कार्कीको संगीत छ । महेन्द्र अधिकारीको लगानीमा यो फिल्म निर्माण भएको हो ।