‘कबड्डी ४’ले दिदैछ ‘छक्का पन्जा’को ऐतिहासिक व्यापारलाई चुनौती

शुक्रबारबाट रिलिज भएको फिल्म ‘कबड्डी ४’को ४ दिने कलेक्शनले नयाँ रेकर्ड राखेको छ । यो फिल्मले ४ दिनमै ९ करोड हारहारीको व्यापार गरेको बताइएको छ । उसो त वितरक गोविन्द शाहीले ३ दिनमै फिल्मले ९ करोड १५ लाखको व्यापार गरेको दाबी गरेका छन् ।

यो फिल्मले रिलिजको ५ दिन अर्थात आजसम्म १० करोडको ग्रस छुने निश्चित छ । दोश्रो सातामा पनि ठूलो फिल्म नभएका कारण यो फिल्मले सुखद कमाई गर्न सक्छ । नेपाली फिल्ममा अहिलेसम्म सर्वाधिक कमाई गर्ने फिल्मको रेकर्ड ‘छक्का पन्जा ३’को छ । वितरक र निर्माताको दाबी मान्ने हो भने यो फिल्मले १८ करोडको ग्रस कलेक्शन गरेको थियो ।

५ दिनमै १० करोडको व्यापार गरेको ‘कबड्डी ४’ले ‘छक्का पन्जा ३’को ऐतिहासिक व्यापारको रेकर्डलाई चुनौती दिएको छ । फिल्मले दोश्रो साता पनि सुखद कमाई गरेको खण्डमा ‘छक्का पन्जा ३’को रेकर्ड तोडिन सक्छ । फिल्मले ओपनिङदेखि दैनिक कलेक्शनमा भने नयाँ रेकर्ड बनाइसकेको छ ।

रामबाबु गुरुङको निर्देशनमा तयार भएको यो फिल्मलाई ‘कबड्डी’ सिरिजको फाइनल म्याच भनिएको छ ।