‘मन्त्र’ हलमा, तर कम शो

आजबाट नयाँ नेपाली फिल्म ‘मन्त्र’ रिलिज भएको छ । सौगात मल्ल, वुद्दि तामाङ र दिया पुनको मुख्य भूमिका रहेको यो फिल्मले देशभरका हलमा निक्कै नै कम शो पाएको छ । यो फिल्मलाई देशकै ठूलो चेन क्यूएफएक्सले हरेक हलमा एक शो दिएको छ । क्यूएफएक्समा यो फिल्मले जम्मा ९ शो पाएको छ ।

बीग मुभिज, वान सिनेमाज् लगायतका हलमा पनि यो फिल्मका लागि कम शो छुट्याइएको छ । आजबाट २ नयाँ हिन्दी फिल्म पनि रिलिज हुनु, २ साता अगाडि रिलिज भएका ‘केजीएफ २ र ए मेरो हजुर ४’को क्रेज कम नहुनु आदि कारणले पनि यो फिल्मलाई कम शो मिलेको हो ।

यो फिल्मको प्रिमियरमा फिल्मीकर्मीले यसको बिषयवस्तु रुचाएका थिए । तर, प्रचारप्रसारमा कञ्जुस्याँई गरेकै कारण यो फिल्म दर्शकसम्म पुग्न सकेन । जसकाकारण, फिल्मको ओपनिङ निक्कै नै कमजोर हुने देखिएको छ ।
खिल बहादुर गुरुङको निर्देशनमा तयार भएको यो फिल्म मनास्लु हिमालको फेदमा खिचिएको छ ।