‘नाई नभन्नु ल ६’मा अनुभव बाहिरिदा भित्रिइन् आँचल

नायिका आँचल शर्मालाई निर्देशक विकासराज आचार्यले फिल्म ‘नाई नभन्नु ल ४’बाट यो क्षेत्रमा भित्राए । यसपछि, आँचलले करिअरमा सुखद प्रगती गरिन् । उनै, आँचललाई विकासले अब ‘नाई नभन्नु ६’मा मुख्य नायिकाको रुपमा अभिनय गराउने भएका छन् ।

भदौबाट छायांकनमा जाने यो फिल्मका लागि आँचलसँग मौखिक सहमती भैसकेको विकासले बताए । उनले भने–‘हामी कथा लेखिरहेका छौं । आँचल मुख्य भूमिकाका लागि फाइनल हुन् ।’

सामिप्यराज तिमिल्सिना र विकास आचार्य मिलेर यो फिल्मको कथा लेखिरहेका छन् । यसपटक, फिल्मको हरेक सिरिजमा देखिएका बाल–कलाकार अनुभव रेग्मी भने नहुने संकेत विकासले गरेका छन् । अनुभव ठूलो भएकाले पनि उनलाई बाल–कलाकारको रुपमा प्रस्तुत गर्न गाह्रो हुने विकासले संकेत गरे ।

यो फिल्मको पाँचै वटा सिरिज सुपरहिट भएका थिए । विकासले छैटौ सिरिजको कथा भने खुलाएका छैनन् । फिल्ममा एक जना नायिका केन्द्रिय भूमिकामा हुनेछिन् ।