पूजा र अनमोलः फिल्म पनि नखेल्ने, खेल्दैनौं पनि नभन्ने

फिल्म ‘म यस्तो गीत गाउँछु २’को प्रिमियरमा नायिका पूजा शर्माले नायकद्धय भूवन केसी र अनमोल केसीलाई निमन्त्रणा गरेकी थिइन् । तर, फिल्मको प्रिमियरमा यी दुबै नायक उपस्थित भएनन् । यसपछि भने पूजाले दुबै जनासँग चित्त दुखाइन् ।

तर, बैगुनीलाई गुनले मार्नुपर्छ भने जस्तै बुधबार आयोजना भएको नायक अनमोल केसी अभिनित फिल्म ‘ए मेरो हजुर ४’को विशेष शोमा भने पूजा उपस्थित भइन् । पूजाले नायक अनमोल केसीको अगाडि नै आफ्नो फिल्मको प्रिमियरमा नआएको भन्दै चित्त दुखाइन् ।

पूजा र अनमोललाई एकसाथ काम गराउने भन्दै फिल्म ‘प्रेमगीत’मा अफर गरिएको थियो । तर, अनमोलले फिल्म खेल्न मानेनन् । यसपछि, पूजाले बनाउने हरेक फिल्ममा अनमोललाई नै पहिलो अफर गएको हुन्छ । तर, अनमोल र पूजाको जोडी पर्दामा देखिन सकेको छैन ।

पत्रकारको प्रश्नमा अनमोलले भने–‘हामी चाडै नै फिल्ममा काम गर्छौ । हामीले काम गर्यौ भने त्यो लभ स्टोरी फिल्म नै हुनेछ ।’

अनमोलले फिल्ममा चाडै नै काम गर्ने बताइरहँदा पूजाले भने, दुई जनाको केमेष्ट्री नजुरेको बताइन् । भनिन्–‘खै, हामी दुईविच काम गर्ने भनेको लामो समय भैसक्यो । तर, के जुरेको छैन । आशा छ, चाडै नै हामी फिल्ममा काम गर्नेछौ ।’
पूजा र अनमोलले एकसाथ फिल्ममा काम गरेको दर्शकले पनि हेर्न चाहेका छन् । तर, यी दुइले काम गरेका पनि छैनन् र गर्दैनौ पनि भनेका छैनन् ।