अभिनेता तथा निर्माता गजित बिष्ट सम्मानित

अभिनेता तथा निर्माता गजित बिष्ट सम्मानित भएका छन् ।

बिष्टलाई विराटनगर महानगरपालिकाको साँस्कृतिक सल्लाहकारमा रहेर नेपाली फिल्म, गीत संगीतको श्रीबृद्धिमा खेलको भूमिकाको मूल्याङकन गर्दै उनलाई सम्मान दिइएको हो ।

विराटनगर महानगरपालिकाका नगर प्रमुख भीम पराजुलीले आफ्नो कार्यकक्षमा आयोजित एक समारोहका बीच बिष्टलाई खादा, फूलमाला सहित सम्मान पत्र प्रदान गरे । लामो समयदेखि विष्ट फिल्म निर्माण, अभिनय र मोडलिङमा क्रियासिल रहँदै आएका छन् ।

‘मायाज बार’ शीर्षकको फिल्मबाट अभिनयमा प्रवेश गरेका बिष्टले ‘लभ यु बाबा’ ‘हैरान’ आदि फिल्म निर्माण गरेका छन् । भर्खरै डान्स च्याम्पियनको निर्देशन गरेका बिष्टले चाँडै नयाँ फिल्म निर्माणको काम अगाडि बढाउने जानकारी गराएका छन् ।

गजितले विराटनगरबाटै कलाकारिता सुरु गरेका हुन् । कोरियोग्राफर र मार्सल आर्ट खेलाडीको रुपमा करिअर सुरु गरेका गजितले मैतिदेवीमा ‘डान्स फिभर’ नामको नृत्य स्कुल पनि चलाउने गरेका छन् ।

सम्मानले कलाकारितामा अझ सशक्त रुपमा अगाडि बढ्न हौसला दिएको बिष्टले बताए ।