आलियाको इन्स्टाबाट हट्यो ‘आरआरआर’को पोष्ट, सिन काटिएपछि असन्तुष्ट

बलिउड नायिका आलिया भट्टको स्टारडम चम्किएको छ । उनी, फिल्ममा एक्लै दर्शक तान्ने हिम्मत राख्छिन् । तर, साउथका निर्देशक एसएस राजमौलीको फिल्म ‘आरआरआर’ हेरिसकेपछि भने दर्शक आलियाको भूमिकालाई लिएर निराश देखिएका छन् । फिल्ममा आलियाको भूमिका थोरै छ, जुन प्रभावकारी पनि छैन । बलिउडकी स्टार नायिकाले किन यति छोटो भूमिकाका लागि स्विकार गरिन् भन्ने प्रश्न पनि उठेको छ ।

यसैविच, आलियाले आफ्नो सामाजिक संजाल इन्स्टाग्रामबाट फिल्मसँग सम्बन्धित अधिकांश पोष्ट हटाएकी छिन् । उनले, आफ्नो एक सिंगल पोष्टर बाहेक अरु पोष्ट हटाएकी छिन् । आलियाले यो फिल्मको खुलेरै प्रमोशन गरेकी थिइन् । फिल्मका हरेक पोष्टर, गीत र कार्यक्रमको तस्वीर पनि शेयर गरेकी थिइन् । तर, आलियाको इन्स्टामा अहिले कुनै पनि पोष्ट छैनन् ।

आलिया आफ्नो भूमिका फिल्मबाट काटिएपछि असन्तुष्ट रहेको भारतीय मिडियाले उल्लेख गरेका छन् । निर्देशक राजमौलीले आफ्ना दृश्यहरु काटेर थोरै भूमिकामा खुम्चाइदिएपछि बलिउड स्टार नायिका आक्रोशित बनेकी हुन् । यसैले, उनले फिल्मसँग जोडिएका पोष्टहरु हटाएकी हुन् ।

शुक्रबारदेखि रिलिज भएको फिल्मले बक्स अफिसमा बम्पर कमाई गरिरहेको छ । तर, फिल्मकी नायिकाले भने यसमा खुशी मनाउन सकेकी छैनन् ।