फिल्मको प्रमोशनबाट टाढा, म्युजिक भिडियोसँग प्रियंकाको माया गाढा

नायिका प्रियंका कार्की ३ बर्षपछि म्युजिक भिडियोको काममा फर्किएकी छिन् । बैबाहिक जीवनमा बाँधिए लगतै कोरोना महामारी भएपछि प्रियंका घरमै बसिन् । यसपछि, उनी आमा बन्ने सुरसारमा लागिन् । ३ बर्ष भित्रमा बैबाहिक जीवन, आमा बन्दाको अनुभव संगालिसकेकी प्रियंका फेरि काममा फर्किएकी छिन् ।

प्रियंकाले संचारकर्मी नरेश भट्टराइसँग एक म्युजिक भिडियोमा काम गरेकी छिन् । भिडियोबाट काममा फर्किन पाउँदा उनी उत्साहित छिन् । प्रियंकाले पनि ३ बर्षपछि काममा फर्किन पाउँदा नयाँ अनुभव भएको भन्दै भिडियो शेयर गर्न आफूलाई हतार भएको उल्लेख गरेकी छिन् । हुनत, प्रियंका अभिनित फिल्म ‘हेल्लो जिन्दगी’ शुक्रबारदेखि रिलिज हुँदैछ ।

यो फिल्मको प्रचारमा अनुहार पनि नदेखाइएकी प्रियंकालाई म्युजिक भिडियो रिलिजको भने खुबै प्रतिक्षा रहेछ ।

कुनै समय नेपाली फिल्म क्षेत्रकी नम्बर १ यी नायिका आजका दिनमा गसिपका कारण मात्र बढी चर्चामा छिन् । प्रियंकाको फिल्मी यूग सकिएको विश्लेषण भैरहँदा प्रियंकालाई भने फाट्टफुट्ट भिडियोमा काम गर्दा नै खुशी मिलिरहेको छ ।